Daswi jamaat tak Urdu zabaan main kae.n mazmoon likhe. Lekin likhne ka maqsad aam taur par imtihaan may pass hone tak mehdood tha. Uss umr may shayeri likhne kaa shauq tau zaroor tha, magar nasr ki taraf dilchaspi nahi thi. Aur Angreezi zabaan murwajjah (contemporary) fan-o-adab key har pehlue par ghalib thi. (Achchi) Filme.n, novele.n, ya amoomi science ki kitaabe.n, yeh gumaan hota tha, sabhi aksar English mey banayi/likhi gae.n hai.n. Iss ke elawah, kae.n alfaaz jinhe Angreezi may istemaal karne may koi dikkat nahi mehsoos hoti, unke Urdu tarjume ya to ghair maujood hai.n, ya kehne me qadeem sunaae detey hai.n. Yeh wajah, aur kaee aur wajoohat, Urdu zabaan seekhne aur uski mashq karne may ek zehni rukaawat bani. Maheeney saalo.n mai.n tabdeel hogaey, aur din-ba-din Urdu zabaan se taaluq kamzoor hota gaya.

Lekin pechle saal Nusrat Fateh Ali Khan Saheb ki qawwali ki taraf tawajjah hui. Urdu zabaan ki fasaahat, Nusrat Saheb ki awaz, aur gham-e-zindagi ki khoob jami. To sncha Urdu ka istemaal phir se shuru karu.n.